مشروع النهضة ... الحقيقى !


Egypt


طبعا كلنا عايزين بلدنا تتقدم وتنهض وعايزين المجتمع بتاعنا يزدهر ويكون اجمل

وبنقول مين يا ترى اللى هيصلح وكل ما يطلب مننا حاجه
نقول يعنى انا اللى هصلح الكون؟!! 
ليه لا؟!!

طب ابدا بنفسك كده.. انا ابدأ وانت تبدأ وانتى تبدأى..
هنكون كلنا احسن والحكايه سهله خالص
  
اولا طبعا هنراعى ربنا فى كل اللى بنعمله..

يعنى مثلا...

احنا فى مصر نلاقى الذباله مرميه فى كل حته واحنا نقعد نقول كل البلاد انضف مننا ومصر الوحيده اللى تلاقيها وسخه رغم انها ام الدنيا...!!

ليه طب مفكرتش انك لو انت قلت طب انا هبدأ .. وتمنع نفسك من انك ترمى حاجه فى الشارع وترميها فى سله المهملات وحتى لو ملقتش سله مهملات.. حط فى الشنطه خلى الورقه فى ايدك لغايت ما تروح وارميها فى الذباله

الناس هتشوفك بتعمل كده هتقلدك وده يقلد ده وهكذا...

ومصر تبقى نظيفه وكله تمام التمام وعال العال
بلاش تيأس وتقول ده مش هيحصل ابدا ... ايه ضمنك.. كل شء ممكن

مثلا البلاد التانيه متقدمه ليه هى احسن مننا فى اىه يعنى !!

لا بس هما بيفكروا وبيقولوا الامل هو طريق النجاح

ليه احنا نيأس؟!! ليه نفضل زى ما احنا ... ؟!!
وكمان حالنا بيتحول للأسوأ..

وليه تصدق ناس كدابين يضحكوا عليك بشوية شعارات عن النهضة والدين و.....؟!!
ولما يوصلوا للى عايزينه ينسوا الكلام اللى قالوه!!
دول ناس بيفكروا فى مصلحتهم واحنا لازم نكون كلنا مع بعض عشان نتخلص منهم ونكون احسن

يلا نتقدم بنفسنا..

الناس اللى هناك يفرقوا عننا ايه بأه !!

هما كويسن واحنا وحشين!!
لا طبعا ده احنا احسن منهم كمان

بس احنا مجمدين مخنا ومستنين اللى يجى يساعدنا ويعمل الشغل كله
واحنا نتفرج ليه مش نعمل احنا ونصلح مجتمعنا

مفيش حد هيجى يصلحهولنا

يعنى مثلا...

- انت طالب هتصلح الكون ازاى؟ مين هيسمع كلامك لو نصحته؟
هقلك انا بقى يا عم ازاى...

 تدخل كده وتذاكرلك كلمتين ينفعوك وتبقى حاجه كبيره فى المجتمع
وتفيد المجتمع باختراعاتك وبمعلوماتك وبثقافتك
و ساعتها هتكون حاجه كبيره والناس هتسمع كلامك لو قلتلهم محدش يعمل كذا لانه وحش و هيثقوا فيك .. ولو قلت اعملوا كذا علشان حلو هيعملوه مش تيجى كده وانت متعرفش حاجه وتفتى!!

اتعلم وبعد كده فيد الناس وقبل كل ده لازم تكون واثق ميه فى الميه من نفسك وانك تقدر تصلح الكون..

- ولو انت موظف بسيط تعمل ايه علشان مصر تتقدم..؟!

 تجتهد فى شغلك وعملك وتخلص فيه ومتقبلش اى رشوه او ما شابه
وكده ممكن تترقى وتبقى احسن وتفيد الناس اكتر...

- ولو انت طبيب تفيد الناس.. تعالجهم ومش لازم الطمع اللى منتشر الايام دى
شوف انت اللى قدامك مقدرته ايه وخد على قده ولو واحد فقير اوى وتعبان
ليه متعالجوش ببلاش ... ؟! ده كده الناس هتحبك وهتاخد حسنات كتير وكمان هتكون مشهور..

- ولو انت مهندس تخلص فى عملك مش تكروت وخلاص واللى بعده لا
لازم اللى يجيلك يبقى بالتمام والكمال ومش تسيب حاجه ناقصه علشان لو بتبنى حاجه تطلع كويسه وتمام..

- أما بقى لو انت واحد ليك شأن كبير فى الدوله ومش همك حد...
 ليه طب متساعدش الناس اللى محتاجه مساعده؟!!
امر الناس الامر الصح وساعدهم يبعدوا عن الغلط وهموا هيسمعوك وهينفذوا كلامك

- ولو انت تاجر مش تغش الناس فى التجاره .. خد الربح على قدك
مش مثلا الحاجه تبقى ب جنيه تبيعها بعشره!!
ده لمصلحتك انت اولا وثانيه هتبقى تاجر مشهور ومحبوب


وفى عندنا مثل بيقول ..
 حب ما تعمل حتى تعمل ما تحب

احنا بردوا لازم نحب مكاننا وشغلنا علشان يبقى فى تقدم اكتر
لإنك لو حبيت شغلك هتبدع فيه وده لمصلحتك ولمصلحه الجميع

- ولو مش بتشتغل العمل اللى بتحبه مش نهايه الدنيا يعنى
لا جرب يمكن شغلك ده يخليك توصل للحاجه اللى بتحبها بالتدريج...

انت وانت وانت كلكم لكم وظيفه فى تقدم المجتمع

جرب كده وهتلاقى المجتمع بدأ يتصلح من حولك
الحيطه مش هتبقى كويسه لو الطوب والاسمنت مش كويس

واحنا كمان علشان مصر تبقى كويسه لازم احنا كمان نبقى كويسين
ومش مصر بس .. 

لكل بلاد العالم اتقدموا ..  نحن نحب التقدم للجميع

فلو الواحد بدأ بنفسه الكون هيتغير فعلا وهيبقى احسن بكتيييييييييييييير

فعلا الحكايه دى مهمه جدا
ولازم كلنا ننفذها من أصغر واحد لأكبر واحد فينا

أتمنى إن الموضوع ينال إعجابكم

فى أمان الله

ليست هناك تعليقات:

إرسال تعليق

هل أعجبك الموضوع ..؟ هل استفدت منه ..؟ هل تتفق أو تختلف مع محتواه من وجهة نظرك ..؟ ننتظر منك تعليقك هنا أسفل الموضوع